Bókamessa í Gautaborg 21.-24. september

19.9.2006

Á fimmtudag hefst hin árlega bókamessa í Gautaborg í Svenska Mässan í miðhluta Gautaborgar. Bókamessan, sem nú er haldin í 22. skipti, dregur að sér rúmlega 100.000 gesti. Meira en 800 aðilar sýna bækur á bókamessunni og á hverju ári er fjöldi þekktra rithöfunda á staðnum. Þess má geta að á síðasta ári var íslenski rithöfundurinn Sjón meðal sérstakra gesta á bókamessunni.

Nokkur íslensk bókaforlög taka þátt í bókamessunni að þessu sinni. Þau eru Almenna bókafélagið, Bjartur, Edda útgáfa, Forlagið, Háskólaútgáfan, Hið íslenska bókmenntafélag, Hörpuútgáfan, Iðunn, JPV útgáfa, Mál og menning, Ormstunga, Salka, Sögufélag og Vaka/Helgafell.

Þema ársins er tjáningarfrelsi og auk sýninga á bókum verða haldnir 444 fyrirlestrar um margvísleg málefni.

Bókamessan er opin fyrir bókaútgefendur 21.-22. september, en opnar fyrir almenning kl. 14 föstudaginn 22. september og stendur fram á sunnudag. Sjá nánar www.bok-bibliotek.se/