Kór Flensborgarskóla í Finnsku kirkjunni

Ljóð og lag

30.5.2006

Sendiráð Íslands í Stokkhólmi stóð fyrir menningarvökunni ,,Ljóð og lag” sem var haldin í Finnsku Kirkjunni í gamla bænum á uppstigningardag.

Guðmundur Árni Stefánsson sendiherra flutti ávarp og bauð um hundrað manns velkomna, góða blöndu Svía og Íslendinga búsetta í Stokkhólmi, sem komnir voru á menningarvökuna til að njóta kórsöngs og ljóðalesturs. 60 ungmenni Flensborgarskólans í Hafnarfirði sungu lög úr ýmsum áttum undir stjórn Hrafnhildar Blomsterberg kórstjóra og Matthías Johannessen, fyrrum ritstjóri Morgunblaðsins og ljóðskáld, flutti nokkur ljóða sinna á íslensku. Bára Lyngdal Magnúsdóttir leikkona las sænska þýðingu á ,,Lennon”, ljóði Matthíasar og Heimir Pálsson lektor í íslensku við háskólann í Uppsölum stýrði dagskránni af röggsemi.

Matthías Johannessen

Var mikil ánægja gesta með framlag þessara góðu listamanna sem sóttu Stokkhólm heim og var viðburðurinn mjög vel sóttur þrátt fyrir að hann væri haldin eina mestu ferðahelgi ársins í Svíþjóð.  Icelandair og KB banki studdu við bakið á menningarvökunni ,,Ljóð og lag”.