Íslandskynning í Flórens
Borgaryfirvöld í Flórens buðu sendiráðinu og íslenskum aðilum að halda Íslandskynningu undir yfirskriftinni "Islanda Paesaggi di Luce" í kynningarsal á tveimur hæðum í Galleria Via Larga í miðborginni 28. apríl til 10. maí.
Ferðaskrifstofan Islandtours á Norður-Ítalíu, sem er í eigu Guðrúnar Sigurðardóttur, kynnti starfsemi sína í samvinnu við Icelandair. Haldin var sýning á verkum Rósu Gísladóttur myndlistarmanns og svissneska listamannsins Brigitte Reinhardt. Ásamt sendifulltrúa, opnaði sýninguna Tiziano Lepri, einn af varaborgarstjórum Flórens.
Í heimsókninni átti sendifulltrúi fundi með Eugenio Giani, fulltrúa fyrir alþjóðasamskipti borgarinnar, Paolo Bartolozzi, varaforseta héraðsráðs Toscana, og Giovanna Folonari, menningarfulltrúa Flórenssýslu. Kom fram hjá þeim góður áhugi á samvinnu við Íslendinga, aðallega á sviði menningar- jarðhita- og ferðamála. Var sendifulltrúi beðinn um að koma boði til borgarstjórans í Reykjavík um að koma í opinbera heimsókn til Flórens.
Fékk Íslandskynningin góða umfjöllun í fjölmiðlum á svæðinu. Að kynningunni stóð einnig UNESCO-skrifstofan í Flórens, en veg og vanda hafði af henni Íslandsvinurinn Massimo Sani, lögfræðingur og rithöfundur.
