Samstarfshópur um eflingu viðskipta milli Ítalíu og Íslands stofnaður
Á ársfundi Íslensk-ítalska viðskiptaráðsins 26. október greindu Geir H. Haarde forsætisráðherra og Emma Bonino utanríkisviðskiptaráðherra frá því, að ákveðið hefði verið að stofna sérstakan samstarfshóp (task-force), sem ætlað yrði að greina með hvaða hætti væri hægt að efla enn frekar viðskiptatengsl á milli Íslands og Ítalíu.
Sendiráðið í Róm hefur átt í viðræðum við ítalska utanríkisráðuneytið um stofnun samstarfshópsins og hefur verið rætt um að hópurinn skoði sérstaklega ákveðin svið: 1) Nýtingu umhverfisvænnar orku, en á Ítalíu eru margvíslegir vannýttir möguleikar í nýtingu jarðvarma. 2) Samstarf á sviði rannsókna og háskólastarfsemi. Slíkir samstarfsmöguleikar eru ekki síst á sviði orkutækni. 3) Bankastarfsemi og fjármálaþjónusta. 4) Almenn viðskipti og ferðamennska.
