Lífleg íslensk menningarstarfsemi í Norræna listamannasetrinu í Róm í september

8.10.2007

Í september mánuði hefur íslensk menning verið kynnt þrjú kvöld í Norræna listamannasetrinu í Rómarborg, Circolo Scandinavo. Voru kynningarnar vel sóttar. Tónskáldið Steingrímur Rohloff kynnti tónsmíðar sínar, leikritaskáldið Valgerður Þórsdóttir las úr verkum sínum og verk gjörningahópsins "The Icelandic Love Corporation" var sýnt á mynbandalistakvöldi.

Tónskáldið Steingrímur Rohloff kynnti tónsmíðar sínar hinn 20. september undir yfirskriftinni Serata Musicale. Ræddi hann um hljómsveitarverk sín og gaf áheyrendum kost á að heyra tóndæmi. ítalski gítarleikarinn, Stefano Cardi, lék síðan verk eftir Steingrím. Steingrímur hefur dvalið á setrinu í septembermánuði ásamt leikkonunni og rithöfundinum Valgerði Þórsdóttur.

Valgerður hélt áheyrendum föngnum hinn 24. september með leiklestri sínum úr verki byggðu á sögum Svövu Jakobsdóttur rithöfundar. Verkið hafði verið flutt í Þjóðleikhúsinu í fyrra. Valgerður las einnig nokkrar örsögur, sem til stendur að gefa út innan tíðar. Ásamt Valgerði las finnska ljóðskáldið, Sanna Tahvanainen, upp úr nýlegri ljóðabók sinni.

Undir lok mánaðarins, hinn 28. september var haldið myndbandalistakvöld í samvinnu við norrænu sendiráðin í Róm undir yfirskriftinni ON AIR – From North to South. Sýnd voru 12 myndbönd listamanna frá öllum Norðurlöndunum og Ítalíu. Af Íslands hálfu var sýnt myndbandið “Thank You” frá 2002 eftir gjörningahópinn “The Icelandic Love Corporation”.

Sýningarstjórar voru Mette Perregaard forstöðumaður listamannasetursins og Lorella Scacco listfræðingur. Guðni Bragason sendifulltrúi í Róm bauð gestum upp á veitingar eftir þessar þrjár menningarkynningar.