Framlag Íslands til WFP
10. júlí 2006: Aðstoð við Austur-Tímor:Hinn 10. júlí ákvað ríkisstjórn Íslands að veita 7,5 milljónum kr. til stuðnings við hjálparstarf matvælaáætlunar Sameinuðu þjóðanna (WFP) til aðstoðar íbúum á Austur-Tímor.
Samstarfssamningur (Stand-by Agreement) milli Íslensku friðargæslunnar og WFP gerir það mögulegt að senda starfsmenn af viðbragðslista Friðargæslunnar til starfa á svæðum, þar sem neyðarástand er. Þorbjörn Jónsson sendiráðunautur í skrifstofu friðargæslunnar og Guðni Bragason fastafulltrúi sóttu fund 8.-9. desember hjá WFP í Róm, til að ræða aukið samstarf. Í kjölfar þess var gengið frá því að tveir Íslendingar, Eldar Ástþórsson og Glúmur Baldvinsson færu til þjálfunar í birgðastöð WFP í Bari á Ítalíu. Glúmur fór síðan til starfa um mánaðartíma í Tanzaníu. Þá hefur Ilías Karl Moustakas starfað um nokkurra mánaða tíma í Líberíu innan ramma Samstarfssamningsins.
20.12. 2005: Aðstoð við Malawi:
Ríkisstjórnin ákvað í desember 2005 að styrkja starf WFP í þágu hungraðra í Malawi með ISK sex milljónum (um $95,000,-)
Hinn 11. október ákvað ríkisstjórnin að veita til mannúðar- og neyðaraðstoðar í Pakistan 300.000 Bandaríkjadalir, sem verður á skipt milli verkefna eftirfarandi stofnana: Rauði Kross Íslands 150.000, Barnahjálp Sameinuðu þjóðanna (UNICEF) 75.000 og Matvælaáætlun Sameinuðu þjóðanna (WFP) – 75.000.
31. ágúst 2005: Fundur fastafulltrúa með framkvæmdastjóra WFP.
Guðni Bragason fastafulltrúi átti hinn 31. ágúst fund með James T. Morris, framkvæmdastjóra Matvælaáætlunar Sameinuðu þjóðanna (WFP), í höfuðstöðvum stofnunarinnar í Róm. Matvælaáætlunin er stærsta hjálparstofnun í heimi og kemur matvælum á hverju ári til 90 miljón manns, þar af 56 miljónum barna, í 80 löndum. Fastafulltrúi bar framkvæmdastjóranum kveðju utanríkisráðherra og upplýsti um aukin framlög íslenskra stjórnvalda til þróunarsamvinnu og neyðaraðstoðar og vilja þeirra, til að styðja starf WFP. Minntist hann m. a. á aðstoð við fórnarlömb flóðbylgjunnar miklu á Indlandshafi og aðstoð við skólamáltíðaverkefni fyrir stúlkur í Írak. Íslensk stjórnvöld höfðu áður veitt fé til verkefna WFP í Haítí, Írak og Súdan. Fastafulltrúi ræddi einnig samstarfssamning Íslensku friðargæslunnar og WFP (Stand-by Agreement) og sagði Íslendinga áhugasama um að leggja til heppilega starfsmenn í verkefni WFP.
