Þjálfunarnámskeið á sviði sjávarútvegs

4.10.2005

Undirritað hefur verið samkomulag milli utanríkisráðuneytisins og FAO um þjálfunarnámskeið á sviði sjávarútvegs innan FishCode-ramma FAO (FishCode Custom Training Courses Project), sem haldin verða í samvinnu fiskimáladeildar FAO og Sjávarútvegsskóla Háskóla Sameinuðu þjóðanna á Íslandi á næstu þremur árum. Samkomulagið, sem undirritað af Gunnari Snorra Gunnarssyni ráðuneytisstjóra af Íslands hálfu, gerir ráð fyrir styrk frá íslenskum stjórnvöldum að upphæð einni milljón Bandaríkjadala. Gert er ráð fyrir, að námskeiðin verði haldin í þróunarlöndum og sniðin að þörfum á staðnum. Alþjóðaskrifstofa utanríkisráðuneytisins vann að því að koma þessu verkefni á í samvinnu við dr. Grím Valdimarsson, deildarstjóra fiskiðnaðarsviðs FAO og dr. Tuma Tómasson, forstöðumann Sjávarútvegsskólans. Hugmyndin að verkefninu er upphaflega komin frá Jacques Diouf, aðalframkvæmdastjóra FAO, og komst skriður á málið eftir fund hans með Árna Mathiesen, þáverandi sjávarútvegsráðherra, á Íslandi í fyrra. Guðni Bragason fastafulltrúi afhenti Ichiro Nomura, skrifstofustjóra sjávarútvegsskrifstofu FAO, undirrituð eintök af samkomulaginu á fundi í síðustu viku.