Kristján Steingrímur og Bernd Koberling

Kristján Steingrímur sýnir í miðstöð norrænu sendiráðanna í Berlín

23.11.2004

Myndlistarsýningin “Í FÓKUS” með yfirlitsverkum Kristjáns Steingríms Jónssonar myndlistarmanns, var opnuð í “Felleshúsi” 19. nóvember s.l., sameiginlegu húsi norrænu sendiráðanna í Berlín af Auði Eddu Jökulsdóttur sendiráðunaut. Listfræðilegur ráðunautur sýningarinnar er Ólafur Kvaran safnstjóri Listasafns Íslands. Sýningin verður opin til 31. desember nk. Á opnunarkvöldinu var boðið upp á íslenskt sjávarfang frá fyrirtækjunum SH og SÍF í Þýskalandi og konfekt frá Nóa-Síríus. Meðal annarra styrktaraðila sýningarinnar eru: Icelandair, Eimskip, Alcan, Samskip og Scandotel Berlín. Utanríkisráðuneytið lagði sýningunni til veglegan styrk en einnig menntamálaráðuneytið, Listasafn Íslands, Listasafn Reykjavíkur, Listaháskóli Íslands og Þýsk-Íslenska verslunarráðið.

Kristján Steingrímur, fæddur Akureyringur (1957), stundaði nám við Myndlista- og handíðaskóla Íslands í Reykjavík og Hochschule für Bildende Künste í Hamborg  á árunum 1983 til 1987 hjá prófessor Bernd Koberling.  Hann er prófessor og deildarforseti við Listaháskóla Íslands. Viðfangsefni Kristjáns Steingríms er náttúran og upplifun okkar á henni. Kristján Steingrímur vinnur með ljósmyndir teikningar og málverk. Á sýningunni eru málverk frá síðustu tíu árum.