Nám í Kína

Kínversk stjórnvöld bjóða reglulega styrki til handa Íslendingum sem hyggja á háskólanám í Kína. Íslenska menntamálaráðuneytið hefur séð um að auglýsa þessa styrki og veita umsóknum viðtöku.

Styrkirnir eru ekki bundnir við kínverskunám. Hins vegar skal upplýst að nemendur sem hyggja á almennt háskólanám í öðrum greinum en kínversku verða fyrst að öðlast nægjanlega færni í kínversku til að fá inngöngu. Boðið er upp á staðlað stöðupróf í kínversku, "The Chinese Proficiency Test (Hanyu Shuiping Kaoshi, HSK)", til að kanna kínverskukunnáttu útlendinga.

Fyrir þá sem ekki hafa lært kínversku áður gera kínversk menntayfirvöld kröfu um að lágmarki tveggja ára aðfaranám í kínversku fyrir almennt háskólanám í kínverskum bókmenntum, kínverskri sögu, kínverskri heimspeki, kínverskri listasögu og hefðbundnum kínverskum lækningum.

Ákveðin grunnþekking í kínversku er líka skilyrði til að nemendur geti haft gagn af framhaldsnámi við kínverska háskóla þar sem kennslan er öll á kínversku. Nemendur í raungreinum verða enn fremur að standast inntökupróf í viðkomandi greinum.

Varðandi möguleika á skólavali geta styrkþegar væntanlega haft nokkur áhrif þar á, sérstaklega ef inntökuvottorð frá viðkomandi skóla fylgir umsókn þeirra. Hvað varðar kínverskunám er mælt með því að nemendur stundi nám sitt í Peking þar sem Pekingmál er grundvöllur ríkismálsins sem notað er í háskólunum. Yfirleitt er talið að besti aðbúnaðurinn fyrir kínverskunám sé í Beijing Language and Culture University eða Peking University.


Háskólar í Peking:

Beijing Language and Culture University

Peking University