Viðskipti og iðnaður

Fulltrúi iðnaðar- og viðskiptaráðuneyta í sendiráðinu sinnir rekstri EES-samningsins á þeim sviðum sem heyra undir ráðuneytin tvö ásamt tilheyrandi nefndastörfum innan EFTA og ESB.

Meginhlutverk hans eru að:

• fylgjast með gerðum sem kunna að verða teknar upp í EES-samninginn.
• viðhalda tengslum ráðuneytanna við EFTA, ESA og ESB.
• koma á framfæri og fylgja eftir áherslum Íslands í þeim málum er varða verksvið ráðuneytanna og eru til umfjöllunar innan ESB.
• sitja fundi sérfræðinefnda ESB og taka þátt í vinnuhópum og undirnefndum á vegum EFTA.
• fylgjast með dómum er varða svið ráðuneytanna.
• koma upplýsingum á framfæri við ráðuneytin, viðkomandi undirstofnanir og sérfræðinga á Íslandi um stöðu mála hverju sinni og aðstoða við áframhaldandi vinnslu þeirra.
• viðhalda tengslaneti ráðuneytanna.
• skipuleggja heimsóknir ráðherra, sérfræðinga og hagsmunasamtaka.

Helstu málaflokkar sem fulltrúinn sinnir og tengjast EES-samningnum eru:

• Fjármálaþjónusta (verðbréfamál, bankamál og tryggingamál): Markmið Rómarsamningsins er að koma á frjálsum og óhindruðum flutningi fjármagns milli ESB-ríkja. Kveðið er á um að vinna skuli að því að afnema allar hindranir og mismunun í flutningum eigna manna sem búsettir eru innan sambandsins. Er hér átt við misrétti sem byggist á þjóðerni, búsetu eða því hvar fjármagnið er notað. Meira
• Neytendamál: Með þátttöku Íslands í EES-samningnum og þeirri skuldbindingu sem í honum felst um að setja í innlendan rétt ýmis ákvæði til verndar neytendum í viðskiptum við seljendur vöru og þjónustu má segja að þróun mála á neytendasviði hafi fleygt fram hvað hagsmuni, réttaröryggi og heilsuvernd neytenda varðar. Meira
• Félagaréttur: Ein af meginreglum Evrópska efnahagssvæðisins felur í sér rétt til að stofnsetja og reka félög eða fyrirtæki í svæðisríkjum með sama rétti og landsmenn þar, sbr. 31. og 34. gr. EES -samningsins. Í 77. gr. samningsins segir síðan að XXII. viðauki við samninginn geymi sérstökákvæði um félagaréttinn. Meira
• Atvinnulíf og fyrirtæki: Lítil og meðalstór fyrirtæki eru burðarásinn í atvinnulífi álfunnar og drifkraftur nýsköpunar. Af þeim sökum hefur ESB lagt áherslu á að efla samkeppnishæfni þeirra með sérstakri áætlun ogverkefnum henni tengdum. Þá hefur verið lögð áhersla á að tryggja hagstætt starfsumhverfi evrópskra fyrirtækja með einföldun ólíkrar löggjafar aðildarríkjanna og regluumhverfis. Lítil og meðalstór fyrirtæki eru skilgreind sem fyrirtæki með færri en 250 starfsmenn, með innan við 40 milljóna evra ársveltu eða efnahagsreikning lægri en 27 milljónir evra. Að auki er miðað við að þau fyrirtæki, sem eru stærri en skilgreiningin gerir ráð fyrir, eigi ekki meira en 25% hlutafjár viðkomandi fyrirtækis til þess að þau geti talist lítil eða meðalstór. Meira
• Byggðamál
• Samkeppnismál: Meginmarkmið samkeppnisreglna EES-samningsins er markmiðið um jöfn samkeppnisskilyrði þar sem vörur, þjónusta, fólk og fjármagn flyst óhindrað og fyrirtæki geta stundað viðskipti án þess að samkeppni sé raskað, sbr. 1. gr. samningsins um Evrópska efnahagssvæðið. Samkeppni getur verið raskað ýmist vegna aðgerða ríkisins eða fyrirtækja á markaði og samkeppnisreglunum er fyrst og fremst ætlað að koma í veg fyrir að fyrirtækin á markaðnum spilli fjórfrelsinu svokallaða. Meira
• Upplýsingamál: Almennt er litið svo á að helstu vaxtarsprotar innri markaðarins séu fjarskipti og upplýsingatækni. Áhersla ESB á fjarskiptamál kemur fram í mörgum myndum, þar á meðal átakinu eEurope. Með eEurope er aðildarríkjum ESB bent á lið fyrir lið, hvaða breytingar þarf að gera á lögum og hvaða framkvæmdir þarf að ráðast í svo framþróun verði mest. Einnig eru sérstök átaksverkefni nú í gangi sem hafa það markmið að efla vitund borgaranna um upplýsingaþjóðfélagið, þróa og rannsaka upplýsingatækni í Evrópu, efla samkeppni í fjarskiptum og efla upplýsingatækni sem eykur samkeppni og fjölgar störfum. Meira  
• Orkumál: Orkustefnan í ESB hefur einkennst fremur af markmiðum og hagsmunum einstakra ríkja en sameiginlegri stefnu sambandsins enda er ekki að finna ákvæði í Rómarsamningnum um orkustefnu. Segja má að gerðir Evrópusambandsins um orkumál, sem teknar hafa verið upp í samninginn um Evrópska efnahagssvæðið (EES), hafi einkum lotið að neytendasjónarmiðum, umhverfisþáttum og vilja til að auka hagkvæmni í rekstri orkufyrirtækja og koma á markaðsbúskap í viðskiptum með raforku og jarðgas með því að opna aðgang að flutnings- og dreifikerfum ríkjanna. Meira 

Fulltrúi iðnaðar- og viðskiptaráðuneyta í sendiráði Íslands í Brussel er Angantýr Einarsson

angantyr.einarsson@utn.stjr.is

S: +32 (0)2 238 50 22

Fax: +32 (0)2 230 69 38