Fjármál

Fulltrúi fjármálaráðuneytisins í sendiráðinu í Brussel sinnir fyrst og fremst þeim málaflokkum sem heyra undir ráðuneytið. Að auki er hann annar af tveimur fulltrúum Íslands í stjórn Þróunarsjóðs EFTA.

Megin hlutverk fulltrúans er að: Gæta hagsmuna íslenskra stjórnvalda á málefnasviði fjármálaráðuneytisins. Það er fyrst og fremst gert með því að fylgjast með og hafa áhrif á mótun, innleiðingu og framkvæmd lagagerða sem verða til í Evrópusambandinu og í EES samstarfinu. Til þess að tryggja árangursríka framvindu mála þarf hlutaðeigandi að;

• taka þátt í vinnuhópum og undirnefndum á vegum EFTA
• sækja fundi sérfræðinefnda ESB eftir atvikum
• efla tengslanet og samskipti við starfsfólk stofnana ESB, EFTA og ESA
• fylgjast með þróun mála hjá ESA er varða íslenska hagsmuni
• fylgjast með dómum EFTA dómstólsins á viðeigandi sviðum
• koma upplýsingum, um ofangreind atriði, á framfæri við fjármálaráðuneytið, undirstofnanir þess og hlutaðeigandi sérfræðinga
• tryggja að álit og ákvarðanir íslenskra stjórnvalda skili sér til hlutaðeigandi stofnana í Brussel.

Helstu málaflokkar er fulltrúinn sinnir og tengjast EES-samningnum eru:

• Skattar og opinber gjöld: Skattar eru í flestum tilvikum undanskildir frá EES-samningnum. Hins vegar miðar EES-samningurinn að því að mynda einsleitt öflugt evrópskt efnahagssvæði með sameiginlegum reglum og samkeppnisskilyrðum sem felur m.a. í sér að bannað er að leggja á skatt innan lands á framleiðsluvörur annarra samningsaðila umfram það sem lagt er á innlenda aðila eða ívilna ákveðnum aðilum umfram öðrum.
• Tollar og sambærileg gjöld: Tollamál eru að mestu undanskilin frá EES-samningnum. EES ríkin eru t.a.m. ekki í tollabandalagi Evrópusambandsins. Hins vegar felur samningurinn í sér fríverslun milli aðildarríkja samningsins sem þýðir m.a. að tollar og magntakmarkanir á inn- og útflutningi skuli ekki vera við lýði í viðskiptum þeirra á milli
• Ríkisstyrkir: Reglur Evrópusambandsins um ríkisstyrki gilda í öllum meginatriðum um aðildarríki EES-samningsins. Meginreglan er sú að hvers kyns aðstoð, sem aðildarríki ESB eða EFTA ríki veitir eða er veitt af ríkisfjármunum og raskar eða er til þess fallin að raska samkeppni með því að ívilna ákveðnum fyrirtækjum eða framleiðslu ákveðinna vara, er ósamrýmanleg framkvæmd samningsins að því leyti sem hún hefur áhrif á viðskipti milli samningsaðila.
• Opinber innkaup: Helsta markmið um opinber innkaup er að skylda opinbera aðila til að fara að málsmeðferðarreglum við gerð samninga um kaup á verkum, vöru eða þjónustu sem fer yfir ákveðið lágmarksverð. Þessar reglur fela m.a. í sér að auglýsa þarf verkefni (auglýst) á Evrópska efnahagssvæðinu til að íslensk og erlend fyrirtæki geti keppt um þau á jafnréttisgrundvelli.  
• Lífeyrismál: Lífeyrismál falla að mestu undir tvo málaflokka EES-samningsins. Annars vegar fjármálaþjónustu að því marki er varðar starfstengdan lífeyri, stjórnun og rekstur lífeyrissjóða, ávöxtun iðgjalda, fjármögnun lífeyriskerfa og forsendur fyrir öflugri innri markaði fyrir lífeyrissparnað.  Hins vegar falla lífeyrismál undir almannatryggingar þar sem lögð er áhersla á réttindi lífeyrisþega, þ.e. ellilífeyris, örorkulífeyris, tekjutrygginga, örorkustyrkja og barnalífeyris.  
• Ársreikningar og endurskoðun:Ekki fjallað sérstaklega um reikningsskil eða aðferðafræði endurskoðunar í EES-samningnum. Markmið með sameiginlegum reikningsskila- og endurskoðunarreglum er að efla innri markað ESB og EFTA ríkjanna með samræmdum aðferðum.
• Efnahags- og ríkisfjármál: Reglur evrópska efnahagssvæðisins hafa ekki að geyma ákvæði um efnahags- og ríkisfjármál. Efnahags- og myntbandalag er utan EES-samningsins. Hins vegar segir í samningnum að samningsaðilar skulu vinna að því að styrkja tengsl sín á milli og eiga samstarf á þessu sviði á skipulagðan hátt.
• Fjarvirk gagnaskipti: Ákvörðun um þátttöku EFTA ríkjanna í þessari áætlun er að finna í bókun 31 um samstarf utan marka fjórþætta frelsisins. Samkvæmt ákvörðuninni er stefnt að því að efla og koma á fót samevrópskri rafrænni stjórnsýslu og þróun rafrænna viðskipta í víðum skilningi.
• Þróunarsjóður EFTA

Fulltrúi fjármálaráðuneytisins í sendiráði Íslands í Brussel er:

Angantýr Einarsson

S: +32 (0)2 238 50 22

Fax: +32 (0)2 230 69 38