Sjávarútvegs - og landbúnaðarráðherra í Brussel
Einar Kristinn Guðfinnsson, sjávarútvegs- og landbúnaðarráðherra, hitti þann 16. janúar Marianne Fischer Boel, framkvæmdastjóra landbúnaðarmála Evrópusambandsins, á fundi í Brussel. Þau ræddu stöðu landbúnaðarmála í alþjóðlegu samhengi og þær breytingar sem unnið er að á vettvangi Evrópusambandsins um þessar mundir.
Nú fer fram viðamikil endurskoðun á landbúnaðarstefnu ESB, þar sem þess er freistað að undirbúa landbúnað í ríkjum sambandsins fyrir hugsanlegar breytingar, sem leiða munu af nýjum samningi WTO Alþjóðaviðskiptastofnunarinnar. Enn er þó óvíst um hvort niðurstaða fáist í núverandi viðræðulotu WTO.
Þá ræddu Einar Kristinn og Marianne Fischer Boel hækkun matvælaverðs og þá verðhækkun sem hefur orðið á ýmiss konar aðföngum í landbúnaði.
Marianne Fischer Boel lýsti áhuga á að heimsækja Ísland og kynna sér landbúnað hér á landi.