Kór Langholtskirkju heldur tónleika kl. 20:00, 3. júní nk. í Minoritenkirche í Vín

16.5.2007

Kirkjukór Langholtskirkju var stofnaður árið 1953 og hefur starfað með núverandi hætti frá 1973. Kórinn hefur flutt öll stóru verkin eftir Bach og sviðssetning kórsins á Jóhannesarpassíunni eftir Bach árið 1995 vakti mikla athygli. Yfir áramótin 1999-2000 flutti kórinn Jólaóratoríuna Bachs í sex messum frá jóladegi til þrettánda eins og Bach gerði sjálfur.

Auk þess hefur kórinn flutt fjölda annara stórverka m.a. „Petite Messe solenelle“ eftir Rossini, „Ein Deutsches Requiem“ eftir Brahms, „Messías“ eftir Händel, „Messe solenelle“ eftir Beethoven, „Sköpunina“ og messur eftir Haydn, „Requiem“ og messur eftir Mozart og „Brúðkaupið“ eftir Stravinski. Kórinn flytur reglulega ný íslensk verk og hefur fengið tónskáld til að semja fyrir sig. Hann hefur farið í fjöldamargar tónleikaferðir m.a. til Norðurlandanna, Mið- og Suður- Evrópu, Ísraels þar sem hann flutti Messías eftir Händel, Kanada og Bandaríkjanna og Englands þar sem hann flutti m.a. messu í h-moll eftir Bach í Barbican tónleikahöllinni með ensku kammersveitinni.

Kórinn hefur gefið út fjölda af hljómplötum og geisladiskum m.a. „Land míns föður“, „An Anthology of Icelandic Choir Music“, „Jóhannesarpassían“ eftir Bach, „Barn er oss fætt“ og „Ísland er lýðveldi“.

Árið 2003 frumflutti kórinn Guðbrandsmessu sem Hildigunnur Rúnarsdóttir samdi fyrir kórinn í tilefni 50 ára afmælis hans.

  Jón Stefánsson

lauk kantorsprófi undir handleiðslu dr. Róberts A. Ottóssonar en einleikaraprófi í orgelleik hjá dr. Páli Ísólfssyni. Framhaldsnám sótti hann í Tónlistarháskólann í München hjá prófessor Karli Richter og síðar við Tónlistarháskólann í Vín hjá prófessor Michael Radulescu. Jón hefur verið organisti og kórstjóri í Langholtskirkju nær óslitið síðan 1964. Kór Langholtskirkju hefur vaxið og dafnað undir hans stjórn. Auk þess að stjórna Kór Langholtskirkju hefur hann verið gestastjórnandi hjá Sinfóníuhljómsveit Íslands, stjórnað nokkrum óperum í Íslensku óperunni og ballettinum Giselle við Þjóðleikhúsið. Árið 1991 stofnaði Jón Gradualekór Langholtskirkju ,sem er barna- og unglingakór, sem hefur skipað sér í raðir bestu kóra sinnar tegundar hérlendis. Árið 2000 stofnaði Jón stúlknakórinn Graduale nobili, en þær eru 24  á aldrinum 17 - 24 ára sem vaxið hafa upp úr Gradualekór Langholtskirkju. Kórinn vakti strax mikla athygli og varð í öðru sæti í keppni evrópskra æskukóra í Kalundborg árið 2001. Jón hefur verið kennari á mörgum kóranámskeiðum, m.a. í Færeyjum nokkrum sinnum og tvisvar sinnum á Nordklang.

 Einsöngvari: Ólöf Kolbrún Hardardóttir

hóf að syngja með kirkjukór Landholtskirkju 14 ára að aldri og hefur síðan þá haft með höndum mismunandi hlutverk inann kórsins. Eftir lokapróf hennar frá Tónlistarskóla Kópavogs fór hún í frekara tónlistarnám m.a. í Þýskalandi, Austurríki og á Ítalíu. Ólöf Kolbrún Harðardóttir hefur haldið tónleika í Þýskalandi, Austurríki, Norðurlöndunum og Bandaríkjunum.