Rithöfundurinn Steinunn Sigurðardóttir í heimsókn í Vín.

5.10.2006

Rithöfundurinn Steinunn Sigurðardóttir mun lesa upp úr bók sinni Ástin Fiskana(1993), sem nýverið var gefin út í þýskri þýðingu Colettu Bürling, sunnudaginn 22. október 2006 klukkan 18:00 í bókabúðinni Thalia á W3 Wien Mitte, Landstraßer Hauptstraße 2a/2b, 1030 Wien.

Ástin Fiskana er er saga taumlausrar ástríðu þar sem skyggnst er inn í sál tveggja einstaklinga, elskhuga sem eru í þann veginn að kaffærast í straumi eigin tilfinninga.

Steinunn Sigurðardóttir fæddist 26. ágúst 1950 í Reykjavík, hún lauk stúdentsprófi frá MR 1968, hélt síðan til náms á Írlandi og lauk BA prófi í sálfræði og heimspeki frá University College í Dublin 1972. Steinunn gaf út fyrstu bók sína, ljóðabókina Sífellur, 19 ára gömul og vakti hún strax athygli. Árið 1995 fékk hún Íslensku bókmenntaverðlaunin fyrir skáldsögu sína Hjartastað. Ljóð Steinunnar og smásögur hafa birst í tímaritum og safnritum á Norðurlöndum og skáldsögur hennar verið þýddar fjöldamörg tungumál ásamt því að frönsk kvikmynd byggð á skáldsögunni Tímaþjófinum var frumsýnd í Frakklandi árið 1999. Steinunn telst með sanni einn ástsælasti rithöfundur Íslands og bjóðum við hana hjartanlega velkomna til Vínar.